భారీ ధరకు పలికిన 5 వెండి నాణేలు.. వేలంలో సుమారు రూ. 7.50 లక్షలు కైవసం
ఎన్ ఎన్ జి యువసేన ఆధ్వర్యంలో కన్నులపండువగా నిమజ్జన మహోత్సవం
ముఖ్య అతిథిగా హాజరైన పటాన్‌చెరు ఎమ్మెల్యే గూడెం మహిపాల్ రెడ్డి
ఆకట్టుకున్న 300 మంది కళాకారుల విన్యాసాలు.. సింగర్ మధుప్రియ, కొమురక్కల సందడి
అమీన్పూర్, సెప్టెంబర్ 28:(మెదక్ టుడే) న్యూస్ ప్రతినిధి.సంగారెడ్డి జిల్లా పటాన్‌చెరు నియోజకవర్గ పరిధిలోని బీరంగూడ గ్రామంలో ఎన్ ఎన్ జి యువసేన ఆధ్వర్యంలో నిర్వహించిన వినాయక నిమజ్జన శోభాయాత్ర భక్తిశ్రద్ధలు, అపూర్వ ఉత్సాహం నడుమ అత్యంత వైభవంగా జరిగింది. గ్రామంలోని ప్రధాన వీధులన్నీ లక్షలాది మంది భక్తుల ‘గణపతి బప్పా మోరియా’ జయజయధ్వానాలతో మార్మోగాయి. రికార్డు స్థాయి లడ్డూ వేలం – రూ. 26 లక్షలకు పైగా పలికిన ప్రసాదం:నిమజ్జనానికి ముందు నిర్వహించిన గణనాథుడి లడ్డూ వేలం పాట భక్తుల ఉత్సాహం నడుమ హోరాహోరీగా సాగింది. నియోజకవర్గ చరిత్రలోనే సరికొత్త రికార్డు సృష్టిస్తూ నేరడిగుంట గ్రామ సర్పంచ్ ఒగ్గు సాయికిరణ్ యాదవ్ రూ. 26,01,116/- (ఇరవై ఆరు లక్షల ఒక వెయ్యి పదహారు రూపాయలు) పలికి లడ్డూ ప్రసాదాన్ని కైవసం చేసుకున్నారు.
ఈ సందర్భంగా సర్పంచ్ ఒగ్గు సాయికిరణ్ యాదవ్ మాట్లాడుతూ… ఎన్ఎన్జీ యువసేన ఆధ్వర్యంలో వరుసగా రెండోసారి లడ్డూను దక్కించుకోవడం పూర్వజన్మ సుకృతంగా భావిస్తున్నానని తెలిపారు. గతంలో ఇక్కడే లడ్డూ ప్రసాదం స్వీకరించి, తన గ్రామంలో అనుకూల రిజర్వేషన్ వచ్చి సర్పంచ్‌గా గెలవాలని మొక్కుకున్నానని, ఆ విఘ్నేశ్వరుడి దయతోనే తాను సర్పంచ్‌గా విజయం సాధించానని చెప్పారు. ఆ స్వామివారి రుణం తీర్చుకునేందుకే మళ్లీ ఇక్కడికి వచ్చి లడ్డూను దక్కించుకున్నట్లు పేర్కొన్నారు. అలాగే “బీరంగూడ అంటే నందారం నరసింహ గౌడ్.. నరసింహ గౌడ్ అంటే బీరంగూడ” అని కొనియాడారు. ఇంతటి భారీ ఎత్తున శోభాయాత్రను నభూతో నభవిష్యతి అన్న రీతిలో విజయవంతంగా నిర్వహించిన నందారం కుటుంబ సభ్యులకు, ఎన్ఎన్జీ యువసేన సభ్యులకు ప్రత్యేక ధన్యవాదాలు తెలిపారు.పోటాపోటీగా 5 వెండి నాణేల వేలం పాట:లడ్డూ వేలం అనంతరం స్వామివారి సన్నిధిలో ఉంచిన 5 విశిష్ట వెండి నాణేలకు (సిల్వర్ కాయిన్స్) నిర్వహించిన వేలం పాట సైతం భక్తుల మధ్య హోరాహోరీగా సాగింది. భక్తులు పోటీపడి పాల్గొనడంతో ఈ 5 వెండి నాణేలు సుమారు రూ. 7,50,000/- (ఏడున్నర లక్షల రూపాయలు) పలకడం విశేషం. దీంతో వేదిక ప్రాంగణం భక్తుల హర్షధ్వానాలు, జయజయధ్వానాలతో హోరెత్తింది.
*వివిధ జిల్లాల నుంచి తరలివచ్చిన ప్రముఖులు – ఘన సత్కారం:ఈ వేడుకలకు పటాన్‌చెరు నియోజకవర్గం నుంచే కాకుండా ఉమ్మడి మెదక్, హైదరాబాద్, రంగారెడ్డి తదితర జిల్లాల నుంచి పలువురు రాజకీయ ప్రముఖులు, ప్రజాప్రతినిధులు, వివిధ సంఘాల నాయకులు ముఖ్య అతిథులుగా హాజరయ్యారు. ఉత్సవానికి విచ్చేసిన ఎమ్మెల్యే గూడెం మహిపాల్ రెడ్డితో పాటు ఇతర జిల్లాల నుంచి వచ్చిన విశిష్ట అతిథులను అమీన్పూర్ మున్సిపల్ మాజీ వైస్ చైర్మన్ నందారం నరసింహ గౌడ్, వారి కుటుంబ సభ్యులు, ఎన్ఎన్జీ యువసేన ప్రతినిధులు శాలువాలు, పూలమాలలతో ఘనంగా సత్కరించి, స్వామివారి తీర్థప్రసాదాలు, జ్ఞాపికలను అందజేశారు.అద్భుతంగా నిర్వహించారు: ఎమ్మెల్యే గూడెం మహిపాల్ రెడ్డి
కార్యక్రమంలో ముఖ్య అతిథిగా పాల్గొన్న పటాన్‌చెరు ఎమ్మెల్యే గూడెం మహిపాల్ రెడ్డి స్వామివారిని దర్శించుకుని ప్రత్యేక పూజలు నిర్వహించారు. అనంతరం ఎమ్మెల్యే మాట్లాడుతూ… బీరంగూడలో ఇంత భారీ ఎత్తున, క్రమశిక్షణతో కూడిన ఉత్సవాన్ని నిర్వహించడం సాధారణ విషయం కాదన్నారు. దేశంలోని వివిధ ప్రాంతాల నుంచి 300 మందికి పైగా కళాకారులను రప్పించి తెలుగు సంస్కృతీ సంప్రదాయాలు ఉట్టిపడేలా శోభాయాత్రను తీర్చిదిద్దారని నిర్వాహకులను కొనియాడారు. ఎన్ఎన్జీ యువసేన సభ్యులకు, నందారం నరసింహ గౌడ్ కుటుంబానికి ఆ గణనాథుడి ఆశీస్సులు ఎల్లవేళలా ఉండాలని, భవిష్యత్తులో ప్రజలకు మరింత సేవ చేసే శక్తిని ప్రసాదించాలని ఆకాంక్షించారు.ఆకట్టుకున్న సాంస్కృతిక ప్రదర్శనలు – జనసంద్రమైన బీరంగూడ:
శోభాయాత్ర ఆద్యంతం భక్తులను కట్టిపడేసింది. డప్పు చప్పుళ్లు, కోలాటాలు, విభిన్న పౌరాణిక వేషధారణలు, అఘోరాల నృత్యాలు ప్రత్యేక ఆకర్షణగా నిలిచాయి. తెలంగాణ ప్రముఖ జానపద గాయని మధుప్రియ తన ఆటపాటలతో ప్రాంగణాన్ని ఉర్రూతలూగించగా, బిగ్ బాస్ ఫేమ్ కొమురక్క తనదైన హాస్య విన్యాసాలు, డ్యాన్స్‌లతో సందడి చేశారు. భక్తులకు ఎలాంటి అసౌకర్యం కలగకుండా ఎన్ఎన్జీ యువసేన వాలంటీర్లు విస్తృత ఏర్పాట్లు చేశారు.భక్తులకు, సహకరించిన వారికి ధన్యవాదాలు: నందారం నరసింహ గౌడ్*
అమీన్పూర్ మున్సిపల్ మాజీ వైస్ చైర్మన్ నందారం నరసింహ గౌడ్ మాట్లాడుతూ… వేడుకలను ఇంతటి విజయవంతం చేసిన భక్తులకు, తరలివచ్చిన అతిథులకు, రాత్రింబవళ్లు శ్రమించిన ఎన్ఎన్జీ యువసేన కార్యకర్తలకు, పోలీసు యంత్రాంగానికి పేరుపేరునా కృతజ్ఞతలు తెలిపారు. ఆ విఘ్నేశ్వరుడి కృపతో ప్రజాక్షేమం కోసం ఇలాంటి ఆధ్యాత్మిక, సేవా కార్యక్రమాలు నిరంతరం కొనసాగిస్తామని స్పష్టం చేశారు. ఈ మహోత్సవంలో పటాన్ చెరు నియోజకవర్గం ఇంచార్జ్ ఆదర్శ్ రెడ్డి, బి ఆర్ ఎస్ సీనియర్ నాయకులు గూడెం మధుసూదన్ రెడ్డి, అమీన్పూర్ మున్సిపల్ మాజీ కౌన్సిలర్స్,నందారం కుటుంబ సభ్యులు, స్థానిక ప్రజాప్రతినిధులు, యువసేన సభ్యులు, వేలాది మంది ప్రజలు పాల్గొన్నారు.
