రామచంద్రపురం, నవంబర్ 05:(మెదక్ టుడే) న్యూస్ ప్రతినిధి.సంగారెడ్డి జిల్లా రామచంద్రపురం మండలంలోని విద్యుత్ నగర్ కాలనీలో అక్రమ నిర్మాణాలు, భూగర్భ జలాల మితిమీరిన వినియోగంపై స్థానికులు ఆందోళన వ్యక్తం చేస్తున్నారు. 200 గజాల స్థలంలో గ్రౌండ్ ఫ్లోర్‌తో పాటు కేవలం రెండు అంతస్తులకు మాత్రమే అనుమతి తీసుకుని, నిబంధనలకు విరుద్ధంగా మరో రెండు నుంచి మూడు అదనపు అంతస్తులను నిర్మిస్తున్నారు. దీనివల్ల ఒకే బోర్‌వెల్‌పై అధిక సంఖ్యలో అద్దెదారులు ఆధారపడాల్సి వస్తోందని, ఫలితంగా భూగర్భ జలాలు వేగంగా అడుగంటుతున్నాయని కాలనీవాసులు పేర్కొన్నారు.మరోవైపు, కొంతమంది వరండాలు, రోడ్లపై వాహనాలను శుభ్రం చేయడానికి బోర్‌వెల్ నీటిని విచ్చలవిడిగా వృథా చేస్తున్నారని స్థానికులు ఆగ్రహం వ్యక్తం చేస్తున్నారు.ఇదే పరిస్థితి కొనసాగితే భవిష్యత్తులో తీవ్ర నీటి ఎద్దడి తప్పదని హెచ్చరించారు. అక్రమ అంతస్తుల నిర్మాణాలపై సంబంధిత మున్సిపల్ అధికారులు తక్షణమే స్పందించి చర్యలు తీసుకోవాలని, నీటి వినియోగంపై తగిన నియంత్రణ తీసుకురావాలని డిమాండ్ చేశారు.ఇంటింటికీ తిరిగి అవగాహన:నీటిని కాపాడుకోవడం అందరి బాధ్యత అనే ఉద్దేశంతో కాలనీవాసులు గురువారం ఉదయం 7 గంటలకు ప్రత్యేక అవగాహన కార్యక్రమాన్ని చేపట్టారు. ప్రతి ఇంటికీ వెళ్లి యజమానులను కలిసి నీటిని వృథా చేయవద్దని, పొదుపుగా వాడుకోవాలని విజ్ఞప్తి చేశారు. కాలనీలోని ప్రతి ఒక్కరికీ ఈ సందేశం చేరేవరకు రోజూ ఉదయం ఒక గంటపాటు ఈ ప్రచారాన్ని కొనసాగించనున్నట్లు తెలిపారు.ఈ కార్యక్రమంలో కాలనీవాసులు అరుణ, వినయ్ కుమార్, ప్రవీణ్, శశి, త్రివేన్ తదితరులు పాల్గొన్నారు..
అక్రమ నిర్మాణాలతో విద్యుత్ నగర్‌లో భూగర్భ జలాల సంక్షోభం: నీటి పొదుపుపై కాలనీవాసుల అవగాహన యాత్ర.
RELATED ARTICLES