•అమీన్పూర్ మహిళా విజేతలకు బహుమతులు, నగదు పురస్కారాలు అందజేసిన మాజీ మంత్రి
అమీన్పూర్,మార్చి,11,(మెదక్ టుడే) న్యూస్:ప్రతినిధి.అంతర్జాతీయ మహిళా దినోత్సవం సందర్భంగా అమీన్పూర్లో నిర్వహించిన వివిధ పోటీల్లో గెలుపొందిన మహిళా విజేతలను మాజీ మంత్రి, సిద్దిపేట ఎమ్మెల్యే శ్రీ తన్నీరు హరీష్ రావు తన నివాసంలో ప్రత్యేకంగా అభినందించారు. బిఆర్ఎస్ సీనియర్ నాయకురాలు శ్రీమతి కాటా సునీత రాజు గౌడ్ ఆధ్వర్యంలో విజేతలైన మహిళలు హైదరాబాద్లోని హరీష్ రావు నివాసానికి చేరుకున్నారు. ఈ సందర్భంగా ఆయన స్వయంగా విజేతలకు మెమెంటోలు మరియు నగదు బహుమతులను అందజేసి సత్కరించారు.
మహిళా శక్తికి అండగా ఉంటాం: హరీష్ రావు
ఈ సందర్భంగా హరీష్ రావు మాట్లాడుతూ.. మహిళా దినోత్సవం కేవలం ఒక రోజు వేడుక కాదని, మహిళల ప్రతిభను గుర్తించి వారిని ప్రోత్సహించడం నిరంతర ప్రక్రియ అని పేర్కొన్నారు. అమీన్పూర్లో మహిళల కోసం ఇంతటి అద్భుతమైన కార్యక్రమాన్ని నిర్వహించిన కాటా సునీత రాజు గౌడ్ కృషీని ఆయన అభినందించారు. గెలుపొందిన మహిళల ఉత్సాహం చూస్తుంటే సంతోషంగా ఉందని, భవిష్యత్తులో కూడా మహిళా సంక్షేమ కార్యక్రమాలకు తన పూర్తి మద్దతు ఉంటుందని భరోసా ఇచ్చారు.
హరీష్ రావు చేతుల మీదుగా బహుమతులు అందుకోవడం గర్వకారణం: కాటా సునీత రాజు గౌడ్
నిర్వాహకురాలు శ్రీమతి కాటా సునీత రాజు గౌడ్ మాట్లాడుతూ.అమీన్పూర్లో మేము నిర్వహించిన మహిళా దినోత్సవ పోటీల్లో గెలిచిన సోదరీమణులకు, ఈరోజు స్వయంగా హరీష్ రావు నివాసంలో వారి చేతుల మీదుగా బహుమతులు అందజేయడం మాకు దక్కిన గొప్ప గౌరవం. హరీష్ రావు మహిళా సాధికారతకు ఎప్పుడూ ప్రాధాన్యత ఇస్తారు. వారు ఇచ్చిన ఈ ప్రోత్సాహం అమీన్పూర్ మహిళల్లో కొత్త ఉత్తేజాన్ని నింపుతుంది. రాబోయే కాలంలో అమీన్పూర్ గ్రామంలో ఇలాంటి మరెన్నో సేవా కార్యక్రమాలు చేపడతాము” అని తెలిపారు.బహుమతులు అందుకున్న మహిళలు తమ సంతోషాన్ని వ్యక్తం చేస్తూ, తమను గుర్తించి గౌరవించిన హరీష్ రావు గారికి మరియు కాటా సునీత రాజు గౌడ్ కి ప్రత్యేక ధన్యవాదాలు తెలిపారు. ఈ కార్యక్రమంలో స్థానిక నాయకులు మరియు అమీన్పూర్ మహిళలు పాల్గొన్నారు..
